The Exbats + The Sleeveens Dabadaban
Goner zigiluko bi talde gau berean, eta biak kantu laburretakoak.
The Exbats Kenny eta Inez McLain dira, aita eta alaba, Bisbeekoak (Arizona). Istorioa alabak hamar urte zituela hasi zen: aitak bateria jotzera animatu zuen, berak gitarra ikasten zuen bitartean. Egiten dutena hirurogeiko neska taldeetatik, lehen olatuko punketik eta single perfektuaren obsesiotik dator: Kicks, Hits and Fits (2020) eta Now Where Were We (2021), Goner Recordsen jada.
The Sleeveens Nashvillen sortu ziren, Stef Murphy dublindarraren eta Jamie Mechanen —Stiff Little Fingersen gitarra teknikaria— arteko topaketatik. Eskola zaharreko punk irlandarra Tennesseeko garagearekin gurutzatuta: debuta Dirtnapen egin zuten (2024) eta National Anthem (2025) Gonerren.