Qué pasa en Donosti proiektua

Zergatik dagoen

Aste honetan Donostian zer dagoen jakitea erraza izan beharko litzateke, eta ez da. Programazioa sakabanatuta dago: Udalaren PDF bat, elkarte bateko kartel bat, jai batzorde baten kontua, kultur etxe bateko iragarki taula eta elkarren berri ez duten webgune batzuk. Larunbatean etxetik gertu zerbait dagoen jakiteko, sei tokitan begiratu behar da.

Qué pasa en Donosti-k hori guztia toki bakarrean biltzen du. Gaur zer dagoen, asteburuan zer datorren, auzoko jaiak noiz diren, liburutegia non dagoen, farmazia zer ordutan irekitzen den eta zerbait gertatzen denean zein zenbaki markatu behar den. Hiri bat, helbide bat.

Nork egiten duen

Factor Ideas-en egiten dugu, Donostiako web diseinu eta garapen estudio batean. Urteak daramatzagu bezeroen proiektuetan lanean, eta noizean behin gure kontura ere muntatzen dugu zerbait, bizi garen hiriarentzat.

Hau horietako bat da. Arte hutsagatik egiten dugu: inork ez du kobratzen fitxa bat idazteagatik ez ordutegi bat berrikusteagatik, eta proiektuak ez dio inori fakturatzen. Tarte libreetan egiten da, enkargu batetik bestera, existitzea gustatzen zaigulako eta guk geuk erabiltzen dugulako.

Horrek alde ona eta alde txarra ditu. Ona: ez dago argitaratzen duguna baldintzatzen duen ezer, negozio batek ere ez baitigu ordaintzen, eta beraz bat bera ere ez da besteak baino hobeto ateratzen. Txarra: gutxi gara, eta goazen erritmoan goaz.

Nola egiten den

Fitxa bakoitza eskuz idazten da iturri publikoetatik abiatuta: programa ofizialak, antolatzaileen webguneak eta profilak, udal informazioa, auzoko kartelak eta gida irekiak. Ez dago beste toki batetik osorik kopiatutako ezer, eta baieztatu ezin duguna ez da argitaratzen.

Gunea benetan elebiduna da, eta ez itzultzaile bat gainetik pasatuta egina: orrialde bakoitza euskaraz eta gaztelaniaz dago, bere helbidearekin eta bere testuarekin.

Eta web arina da, bidesaririk gabe. Ez dago izena eman beharrik, ez dago ordainpeko hormarik, ez da daturik eman behar irakurtzeko eta ez da ezer instalatu behar. Zure nabigatzailean gordetzen dena cookien politikan azalduta dago, eta zuk erabakitzen duzu.

Argi utzi beharrekoa

Webgune hau ez da ofiziala eta ez du inolako loturarik Udalarekin, jai batzordeekin edo ekitaldiak antolatzen dituzten erakundeekin. Hiriko bizilagunek egindako argitalpen independentea da.

Datak, ordutegiak eta prezioak zuzen egon daitezen arreta jartzen dugu, baina ekitaldiak lekuz aldatzen dira, atzeratu egiten dira eta bertan behera geratzen dira. Mugitu aurretik, egiaztatu datua antolatzailearekin. Izapideetarako eta behin betiko ordutegietarako, kanal ofizialak. Eta larrialdi batean, 112: argitaratzen ditugun telefonoak gida bat dira, ez larrialdi zerbitzu bat.

Nola lagundu

Datu bat oker ikusten baduzu, planen bat falta bada, zure negozioa ez badago edo duela hiru urteko ordutegiarekin agertzen bada, esaguzu. Zuzendu eta kito: ez dago izena eman beharrik, ez ezer justifikatu beharrik, ez agertzeagatik ordaindu beharrik.

Fitxa bakoitzak behean botoi bat du akats baten berri emateko, eta beti dago helbide elektronikoa. Dena irakurtzen dugu.