«Kandela & Erre», Ertzaren estreinaldia Gazteszenan
Aita-alabak, belaunaldien arteko arrakala eta erretzen denean bakarrik argitzen duen kandela. Antzerki eta dantza estreinaldia.
Zertarako balio du kandela itzali batek? Gehienez ere, apaingarri gisa: argia egin nahi badu piztuta egon behar du, eta piztuta dagoenean erre egiten da. Hortik dator «Kandela & Erre», Ertza konpainiak antzerkia eta dantza uztartzen dituen ikuskizuna.
Pertsonaiak aita eta alaba dira, etxe berean bizi dira eta gutxi dakite bata besteaz. Azken egunetan badirudi hori aldatzera doala, edo behintzat saiatzen direla, eta horretarako belaunaldien arteko arrakalari, sexualitateari, genero-identitateari eta abertzaletasunari aurre egin behar diete. Biek ahalik eta hobekien bizi nahi dute, baina bakoitzaren modua bestearenarekin talka egiten du.
Lana
- Emanaldia: urriaren 3an, larunbata, 19:30ean. Estreinaldia da.
- Interpreteak: Paula Plano Calvo eta Asier Zabaleta.
- Zuzendaritza, testua, koreografia eta musika: Asier Zabaleta.
- Aktore-zuzendaritza: Amaia Lizarralde.
- Ekoizpena: Ertza.
