Antiguako Jaiak

Antiguako jaiak urtarrilaren 20aren inguruan izaten dira, San Sebastian egunean, eta ez da kasualitatea: hiriak San Sebastian Antiguako monasteriotik hartu zuen izena, hementxe zegoena. 2026an urtarrilaren 16tik 25era izan ziren, hilaren 8tik ekitaldi solteak zituztela. Antigua da urtean bi jai dituzten auzo bakanetakoa: hauek eta ekaineko San Juanak.

Bere urtarrilaren 20a

Erdialdeak bere Danborrada egiten duen bitartean, Antiguak berea egiten du, eta ez da bat: hamabost baino gehiago dira. Hilaren 19ko gauean ikurriña igotzen da Benta Berri plazan Sansustene elkarteko danborradaren eskutik, eta handik aurrera bata bestearen atzetik ateratzen dira hogeita lau orduz —Real Club de Tenis, Zubimusu, Santo Tomas Lizeoa, Santa Teresa, Jakintzako Gurasoak, Istingorra, Itxaspe, Xexene, Otsoaren Ulua, Antigua-Luberri, Ur Ttanta, Ekintza—, gazte danborrada goizeko zazpietan Alfonso XIII plazatik ateratzen dela eta haurrena arratsaldean.

Tartean, goizaldeko hiruretatik seiretara, danborrada herrikoiak Matia kalea zeharkatzen du, auzoko edonorentzat irekia eta Iraunkorrak txarangak lagunduta. Eguerdian gaupaseroen argazkia egiten da frontoian.

Urtero errepikatzen dena

• Txupinazo antiguotarra Benta Berri plazan, aurretik Jakintzatik abiatzen den haurren jaitsiera musikatua eta Gaskuña plazako kolore-festa dituela; azken horretara kamiseta zuriz joaten da.
• Poteo dotorea txarangarekin eta Gaskuñatik Benta Berrira doan zezen suzkoa.
• Frontoiko AuzoRock eta AntiguaRock, kontzertuen bi gau jarraian.
• Benta Berritik ateratzen den herri krosa, Istingorra kaleko giza-proba eta emakumeen pala txapelketa.
• Txillardegi gogoan omenaldia bere izena daraman plazan.

Lugaritz kultur etxeak aretoko egitaraua jartzen du —ipuin kontaketak, antzerkia, kontzertuak, mendi jardunaldia— eta Txantxarreka gaztetxeak berea.