POV Tabakaleran: Júlia Nueno eta adimen artifizialaren erabilera militarra Gazan

2024ko maiatzean, Israelgo Aireko Indarrak eta Inteligentzia Dibisioak Israelen Defentsa Saria jaso zuten beren «helburu-fabrikaren» arrakastagatik: algoritmoak eta adimen artifizialeko ereduak erabiltzen dituen sistema bat, pertsonak Gazako helburu militar gisa seinalatzeko. Sistema horrek nola erabakitzen duen kutxa beltz batean dago ezkutatuta. Júlia Nueno Guitart ikertzailea Tabakalerara dator azaroaren 4an, asteazkenean, kanpotik nola ikertzen den kontatzera.

Nor den

Nueno Guitart ikertzaile eta diseinatzaile konputazionala da, eta Forensic Architecturen egiten du lan: Goldsmithsen (Londresko Unibertsitatea) mendeko agentzia da, eta estatuen eta korporazioen indarkeria ikertzeko teknika eta metodo berriak garatzen ditu. Gaur egun, Gazako genozidioa eta Israelgo gobernuak sistema konputazionalak eta AA nola erabiltzen dituen ditu lanaren ardatz.

Zertaz ari den

Hitzaldiaren izenburua «Algoritmoa, lurraldea eta biztanleria: Gazan AAren erabilera militarra ikertzeko tresnak» da. Nuenok kutxa beltz horretara hurbiltzeko diseinatu duten metodologia azalduko du —zaintza digitalak eta lurraldearen kontrolak bizitza zibila berrantolatzen dute bertan, «helburuak» sortzeko—, eta teknologia horiei buelta emateko moduak proposatuko ditu: ezagutza kritikoa sortzeko, ebidentziak biltzeko eta kontuak eskatzeko erabiltzea.

POV zikloa

POV («Point of View») Medialab Tabakaleraren eta Jon Uriarte komisario eta ikertzailearen programa da, kultura digitalaz hura aztertzen dutenekin hausnartzeko, ikuspegi kritiko eta didaktikotik. Udazken honetan adimen artifiziala du ardatz: urriaren 14an hasi zen, Roberto Alonso Trillo eta Marek Poliksekin, eta abenduaren 2an amaituko da Ana Valdiviarekin, Oxford Internet Institutekoa, datu-zentroei eta AAren materialtasunari buruzko bere hurrengo liburua aurkeztuko baitu.

Praktikoa

Tabakalerako 1. aretoan, 19:00etan. Doan da, baina sarrera behar da, Tabakalerako webgunean ateratzen dena. Gaztelaniaz.